كمشان
فى الركن الفاضى
من حدوتة العمر
المليان أحزان
ومكلبش
فى ليالى نضالك
بإيديك وسنانك
أحلام جوّة ف دهاليزك
فاضلالك
وانت بتلعب
على سطح الروح
آخر دور كوتشينة
ونازل
تتمرغ ف ضلالك
وهداك سايبة
متعلق
على مشجب تسويفك
حمالة سيفك
بتشكك ف ضلوعك
وبراعة زيفك
بتشكّك ف يقينك
وحوافر خيلك
بتملس على أرض
استسلامك
أناشيدك بتغنّى
انتكاساتك
وكاساتك
مليانة بخمر استهتارك
قربع يا خفيف
ما باقيش من عمرك
غير كاس
اسكر واكمش
فى الركن الفاضل
من حدّوتة عمرك
واستبدل وعيك
بال
م
و
ت
.....
أبوأمل
هناك 8 تعليقات:
والله يا ابو أمل انا بأشكر الظروف اللى خلتنى اتكعبل فى مدونتك الجميلة اللى بترشها كل يوم ومع ذلك محدش بييجى يزورك وما تذعلش يا ريس الظاهر العيب فينا لأن المدونة جميلة بصراحة و الكلام أجمل .... واللى عجبنى اكتر روحك الجميلة والتى تقترب كثيرا من نفسى ... حتى الشبه بينا فى اختيار لون المدونة و الخط وعموما يا ريس حتلاقينى كل يوم عندك بس انت اكتب وجهز الشاى وما تقلقش ... باالتوفيق و اتمنى دوام التواصل وتشريفنا بالزيارة فى ... احلام صغيرة فالظاهر الحال من بعضه
haneeni.blogspot.com
بص يا ابو الفتوح
مفيش حاجة بتغيظني منك
غير انك بتعرف تلضم الكلام جنب بعضه زي عقد الكهربا بتاع الافراح
لمبة حمرا
ولمبة صفرا
الوان الون
تطفي وتولع
ومن غيرها الفرح ما يكملش
كيف بتلملم الحروف كدة مش عارف
خايف احاول اعمل زيك اتكهرب
يا ابو امل انت امل جديد
حازم شلبى
سعيد بكلامك الناعم الرقيق
وأسعد بتشريفك مدونتى
وانا مش ممكن استغنى عن الحلوين
اللى زيك
ابوشنب
يا باشا احنا برضه بنشخبط على جدار ابداعكم يا ابو الشناب
وبعدين
الكهرباء عمرها ما تؤذى عاشق
خربش والضم
ولون واحنا علينا نشيل الدكك
ونرش الدرب
بس انت افرح يا سيدى
عماد
واحشنى يا عماد با عماد المثالية اللى ف بالى
نفسى الاقى غلطة واحدة
يعنى تخليك من زمرة الناس اللى زينا
رفرف يا بندق فى عالم المثالية
نور يا ابو امل نور يا شنب وانا على دفع الفاتورة هي بلدنا ناقصة غير الكلام المنور دا بس ياريت تخف صورة انقطاع الكهرباء(الموت) في المدونة
القصيدة حلوة قوي بجد
مكثفة وجميلة
وانتى منقي مفرادتها بعناية شديدة
بندق
مش عارف ليه مش بالاقى نفسى فى حالة التوهج دايماً بافرح وانا حزين ما اتعودتش على صدمة الحياة وهزتها الشديدة لينا واحنا بنمشى ع العموم بكرة الواحد يحاول يحب الحياة ويظبط اقطار الأسلاك عنده والمقاومات تتظبط ولا عمره النور هيقطع ولا العيال يقولوا نور يا حسن
بالدقة والبصل
جرينيمو
دا رأى اعتز بيه وسعيد بزيارتك وتعليقك
كمشان في الركن الفاضي
قصيده من حقك تزعل عليها
وبناءّ على تلك القصيدة أو غيرها من قصائدك الذهبية
فأنا أعتبرها بحق هي وأخواتها من القصائد المدونه كلها بدون استثناء كشفت عن شاعر واعي محنك اختمر شعره جيدا فوق دفء ذاتية الكلمات المنصهره داخل كانون ذاتيته فتجمعت مفردات التجربه الشعريه داخله لتشكل حطبا يعرف جيدا كيف يشتعل ..يتحول نار.. يتأجج .. ولا يعرف كيف ينطفئ ويتحول رمادا
ولكن هذا لا يمنعني من محاوره هادئه مع شاعرنا الجميل
ان الركن الفاضي لم يصبح فاضي بوجوده فيه
وأتسأل هل شاعرنا عن قصد كتب في المقطع الأخير
الركن الفاضل
أم هذا خطأ في التدوين ليس الا
وأسال عن المفارقة في
ومكلبش
فى ليالى نضالك
بإيديك وسنانك
وبين
ونازل
تتمرغ ف ضلالك
وفي النهايه لا يسعني الا الكشف عن سعادتي حينما التقي مع شارعر بجد
ودعوة أخرى لزيارة مدونة شاعر من الطيور المهاجرة تستحق الزيارة
http://mosaiiic.blogspot.com/
دعوة لزيارة القاصة والشاعره سهى ذكي
http://soha-zaki.blogspot.com/
إرسال تعليق