سنة مرت على دخولي عالم البلوجر

التاسع عشر من ديسمبر عام 2005 شهد دخولى عالم البلوجر من أضيق أبوابه لماذا من اضيق ابوابه
مش من اوسع ابوابه وما هى الظروف التاريخية لهذه الخطوة الجبَارة
كلما تذكرت هذه الظروف يطرأ على ذهنى فجأة موقف سمير غانم فى مسرحية المتزوجون عندما وجد شيرين واقعة فى بلاعة قام بص زي الناس لا منه ولا عليه قوم واحد زقه فاتصورت شيرين انه هو البطل الهمام اللى جه ينقذها من ظلمات البلاعة فوقعت ف دباديبه اهو انا دخلت علم البلوجر بهذه الطريقة قاعد لا بيا ولا عليا ع الدرباس / وهو المنتدى الثقافى بتاعنا ف الصعيد المهم ابوشنب صاحب مدونة اكتبينى فى دفاترك عاشق aboshanab.blogspot.com الله يجازيه قاللى هاتلى مجموعة من قصائدك وانا اعملك مدونة خير يا سيدى مدونة ما احنا كدة حلوين أصر ابن الحلال وعمل المدونة تحت عنوان الديوان ونزل بعض القصائد وأسهم فى نشرها بعض الشيء ثم ألقى فى وجهى قطعة من الورق مكتوب عليها كلمة سر ويوسر نام وسافر إلى بلاد النفط وطبعاً وقعت فى خطأ عظيم حرمنى من التدوين وحرم التدوين منى عارفين ليه ؟؟ بلاش فضايح بعد مدة من خلال محاولات مضنية تمكنت من اكتشاف الخطأ وعدت بقوة فى شهر مايو 2006 وانا مازلت حى أرزق فى دنيا التدوين لدىَ فضلة خيركم اربع مدونات

هى منين اجيب ناس

ومدونة صعيدى شحط محط

ومدونة الكناشة

ومدونة قلم نونو

فقط لا غير هذه هى قصة دخولى عالم التدوين ما رأيكم
وأنا احتفل بهذه المناسبة العظيمة
وبهذه المناسبة أروى لكم سبب اختيار عنوان المدونة
منين اجيب ناس

فى مدونة قلم نونو

فتحى محمد حمدالله / ابوامل

يا ناس يا هوووه
منين اجيب ناس
لمعناة الكلام يتلوه
الليلة هـ نقولكم عبرة
با ناس يا هووووه
عبرة ومستخلصة
من العذاب والويل
حواديت ومتبعترة
فيها الكلام مواويل
الأولة آه يا بلد
فيك الولاد تايهين
زهور ومتفتحة

ضاربة الجدور

فى الطين
والتانية ليه يا بلد
فيك العجب ألوان
فيك الخسيس مغتنى
والأصيل عريان
وفيه وشوش
بتحوش بسمتك يا زمان
وشوش فاشوش
عايقة ومتلغمطة
سبع تلوان
والتالتة مين يا بلد
يغنيلك مواويلك
ويديلك حبابى عنيك
ويلضملك قليب أخضر
عشان تكبر آمالك فيه
ويستنظر حنان قلبك
وحضن يلمه ف الضلمة
ومين غيرك
مين يؤويه ؟
وتيجى ف عز
ليل البعد والفرقة
تبوس بكرة وامبارح
وفجر بيتولد ف عنيه