يا نـيـــل يا عـــــــيـــنافتتاحية
يا أيها الملك المتاجر بالخلود
فيلك مولّى ضهره للنيل العنيد
والناس تولى ضهرها
وتغييييييب
فى توهة وارتحال
متـــــــن
النخل حادف فوق دماغ الخلق
حواديت
غارز جوّة عين الشمس
ســـــــــلاع *
لايم على النيل المطبق ضفتينه
لايف على الطير اللى ساكن
فى تلا فيف الجريد
لامم القلب النضيف
شماريخ بلح
على السبايط ملضومين
الحلم لما ينشرخ ما يهمهوش
والجدر يستنى العكار ما يلاقهوش
ما يلاقى إلا دمعتين متسرسبين
من خد مركبنا العجوز
والصارى من عجز الخيطان جواه
بيسك فى وش النسيم
كل البيبان
والنخل واقف فى المسا شامخ
كما فارس فى رقصة نصر
بيحكى للولاد حدوتة ملتوتة
ويخبى جوة جرابه تمر
والنيل يخبى دمعته
وجوة ترابه جمر
هامـــش أول
خشب المراكب بيندهك
يا طمى يا مسافر لأطراف البلاد
والكف لاخضر للعيال
ناده على يوم الحصاد
والفرن ما عادت تطقطق للخبيز
والزغرودات فوق الشفايف
ناشفانين
باهت يا لون الحنة ف كفوف البنات
موجوع يا نــــيل
من الصيف اللى مش جايب وراه
فـ يــ ضـ ا ن
هامـــــــش تانى
ع المورده بعيونك الزايغين
مصلوب مستنى مين ؟
البنت ام الضفاير مفرودين
على كتاف النسيم ؟
مشــتاق غنــــا ؟
رنة الخلخال فى اقدامها الرخام
محبوسة فى صندوق نحاس
ف دولابها القديم
جرتها مرمية وحيدة
على سطح بيتها الجديد
بتنز من عطش السنين
وانت ع الموردة
لساك مستنى مين ؟
قلقان ووحدانى
وحزيــــــــــن
هامـــــش أخـيــــــر
يا عين يا نيل
يا سلسبيل
سلسال سبيل
اقدامنا دايبة فوق خطاه
وكفوفنا ممدودة لعطاه
يا نيل يا عين
يا دمع محتاجلك عنين
ما بين شطوطك مش مياه
دا دمع عين
المظلومين
المجروحين
العاشقين
لتراب الوطن
* السلاع : شوك النخيل
أبوأمـــــل
هناك 17 تعليقًا:
الشعر فيك طرح وصبح جميل
بيوته تدلى في سبايط النخيل
قوافيه مراكب بتعشق النيل
واللهي انت بجد شاعر كبير
وكلامك بيدخل النافوخ
وبيطرب طرب مالوش حد
ايوه كده امتعنا
انت مقصر قوي ناحيتنا
وناحية الكنز الدفين اللي مستخبي ده
انت مشكلة بجد
سلاع وشماريخ وسبايط
كلامك حلو
وحلو قوى كمان
احلى حاجة انك بتعبر عن طريق مفردات البيئة اللى انت عايش فيها
بس خلى بالك فيه ناس كتير مش هاتفهم مصطلحاتك اللغوية
انت مقلتليش انت منين فى قنا يا أبوعمو
حسن ارابيسك
اشكرك على متابعتى واعترف بتقصيري ولن تتكرر هذه الحركات القرعة من الأهمال
البدراوي
ولد العم سبق وسألتك انت من فين واعتقدت انك من اسيوط
على فكرة انا من نقادة / كوم الضبع
من ناحية القصيدة فأكيد هتتحس كويس لو هى قصيدة حلوة
والله وحشتني أشعارك ياأبو أمل
الله الله الله
ايه الحلاوة دي يا ابو الفتوح يا جامد
لا فجرت يا واد
ايه اخبار البلاد عندك
يا ريت تكونو بخير
كل سنة وانت طيب
ويعود علينا وعليكم الايام بخير
وطبعا سيادتك مش فاضي ترد على الموبايل
بنرن ولا حد بيعبرنا حتى
يا سيدي يا سيدي
الله يبارك له
موبايلات وكروت شحن وحركات
مكسوفة
وانا وحشتنى تعليقاتك اللذيذة المفيدة
ابو شنب
كل سنة وانت طيب البلد بخير والجميع هنا بيسأل عنك
ونتمنى لك الخير
....
هو انت اللى بترن
وانا اقول مين اللى بيرن عليا من رقم غريب افتكرتك حد بيرن غلط
معلهش جديد وغشيم ف الصنعة
تحياتى
راركت لأبوذكرى ؟؟؟
احببت أن أكون أول واحد في البلوجرية يقولك كل سنة وانت طيب بمناسبة العيد الأضحى المبارك
حسن
حسن ارابيسك
كل سنة وانت طيب يا ابوعلى
هاه اقولك ايه بس
.
.
.
يا دمع محتاجلك عنين ؟؟؟؟
طيب يا سيدي
الهنا ما اعدلك
مليك كل من ملك
............
لبيك قد لبيت لك
لبيك ان الحمد لك
............
و الملك لا شريك لك
ما خاب عبد سالك
...................
انت له حيث سلك
لولاك يارب هلك
..................
لبيك ان الحمد لك
و الملك لا شريك لك
.....................
كل نبي و ملك
و كل من اهل لك
...................
و كل عبد سالك
سبح او لبي فلك
................
لبيك ان الحمد لك
و الملك لا شريك لك
...................
و الليل لما ان حلك
و السابحات في الفلك
.................
علي مجاري المنسلك
لبيك ان الحمد لك
.........................
و الملك لا شريك لك
يا خاطئا ما اغفلك
....................
اعمل و بادر اجلك
و اختم بخير عملك
...............
لبيك ان الحمد لك
و الملك لا شريك لك
....................
هذه القصيده لشاعر الخمريات الشهير ابو نواس، احببت ان اهديها لكم بمناسبة وقفة عرفات و عيد لاضحي المبارك، كل عام انتم بخير ،تقبل الله منا و منكم طيب القول و صالح العمل
.........................
كل سنة وانت طيب يا قريبى
عيد سعيد
كل سنة و انت طيب و بألف خير و عيد سعيد يا ريس .. فينك من زمان
تحياتى يا ابو امل و بعدين احنا ماشلناش اللينك ولا حاجة لينكك زى الفل و بخير ماعاش و لا كان اللى يقرب منه
آدم المصري
كل سنة وانت طيب
ارجو ان تكون القصيدة قد اعجبتك
ذو النون المصري
كل سنة وانت طيب واشكرك على هذا الإختيار المناسب لعيد الإضحى
البدراوى
كل سنة وانت طيب يا ولد العم
بس انت حيرتنى انت منين هتقول ولا لاع
حازم شلبى
كل سنة وانت طيب ودمت لى قلعة للوفاء ولإخلاص
أوجه التحية إلي كل أعضاء المدونة ، وأحب أن أذكر إعجابي بهذه المدونة ...
وأود أن أدعو جميع الأعضاء والزوار بالتسجيل والمشاركة في منتدانا الذي يحمل نفس الإتجاهات تقريباً علي الرابط التالي :
http://new-moool.ahlamontada.com
إرسال تعليق