مهداة إلى مطرب الأحياء الشعبية شعبان عبد الرحيم الذي شاهدته على دريم مع أ/ منى الشاذلى فى العاشرة مساءً فتحدث فى السياسة فأثبت أنه ألئم ( أكثر لؤماً ) من أي راجل فى بر مصر ...
نفسى
أبقى زعيم للأمة العربية
ملك سلطان أو حتى رئيس
ما يضرش
ويكون ولاد تورثنى
فى الحكم
وحرمة تعمل ف عيال الناس
مابدالها
يعنى تقريهم فى مدارس
وتقري على أهاليهم فى مدافن
موتى
أو أحياء
طبعاً هـ يكون لى
سلطان ونفوذ
وفلوس وتيوس
رؤساء تحرير
للتسبيح بالحمد
على صفحات الجرانين
وف قلب الفضائيات
الفاضية
بالتحديد فى الفضائية
اللى اللوجو بتاعها
فردة جزمة طبعاً هـ تلم
المشاهير الطراطير
الشخصيات المخصيات
الوطنيين الرطنيين
بالأقلام المنحازة
بالسكاكين الحازة
فى رقاب الخونة
أولاد الكلب
********
طبعاً لما أبقى
رئيس
هـ يكون لى دولة وأمن
وأمن الدولة
وجيوش ومواكب
موتوسيكلات
قدامى وورائي
وكروش بتداهن
وترائي
لما تهف عليا غزالتى
وأقص شريط
على ناصية شلرع الجرابيع
لازم كل الناس تتهد
فى بيوتها
لازم كل شوارع حاضرتي
يقف حالها
- طالب رايح تمتحن الثانوية العامة ؟
- ممنوع
- عيان رجلك والقبر ؟
- ما تموت
- استاذ جامعى رايح تدى محاضرة ؟
- وأنا مالى
- قاضى رايح تحكم فى قضية ؟
- انت بالذات ممنوع طبعاً هـ يجينى درويش
- بزبيبة ودقن
ويقول لى إن الفاروق
كان بينام تحت النخلة
ومش عارف إيه
راح اقوله : ياخى أحّا
وهسب له الدين
ما أنا غول فى السب
وضرب الشلاليت
وقبيح جداً مع أمثالهم
هو انتو صحابة
واللا أنا يعنى صحابى
معلهش فى اللفظ يا شعبى
سامحونى
ما أنا ريسكم
أنا صاحب أول ضربة فاس
فى المشروع القومي
لزراعة سبعين مليون فدان
كوسة وقرع وفاقوس
وخيار
والله ما ليكو عليا حلفان
ما ليا خيار
فى المريسة والملك
أنا مرة صحيت م النوم
وقالولى اتمريس واتملك
وعاديكم
********
مش أنا يا اخوانا
أول من عدل فى القوانين
علشان أديكم حريتكم
- ما تردوا
- أيوة ياريس
- وانا يا اخوانا
- أول من داس تور على رجله
وما قالش أىىىىى
- ولذلك أنا غيرت الدستور
- غيرتلكو الدستور يا أخوانا
- ما تردوا
- ( بصوت مكتوم فى الصدور ) :
- أيوة يا تور
- وانا يا شوية جرابيع
- مش باسقيكم بإيديا الحرية
نقطة بنقطة
قلبى عليكم خايف جداً
جرعة زيادة تعمل فوضى
أو حتى غثيان أو قيء
يللا اتهنوا
سوا واتمنوا
قولوا وغنوا
إدي إدى إدى
إدينا كمان حرية
شكراً شكرأ شعبي الحر
******
نفسى ف حاجة وانا ع الكرسى
نفسى ألم الشمل العربي
عارف صعب
عارف إن ولاد الكلب
مش ممكن يتفقوا ف رأى
ولذلك
حفضل فى القصر الموحش
وهـ بص ف جدرانه وسقفه
واشمشم فى الملل العربى
وأململ فى المش البعري
وأمشمش فى البعر المللى
وأعرب فى اللمم المشى
.............................
..............................
...........................
وإييييييييييييييييييييييييييييييه
بس خلاص
هناك 8 تعليقات:
جامده جدا
وعلى قد ما دمها خفيف
بتنقط سواد
انا شفت الحلقه والراجل اتكلم زى اى حاكم عربى اصيل
فاهم ان الحكم زى الورث رزق ربنا بعته بس بدل ما يبعت فلوس
بعتله شعب
رحت في الغويط يا خال
ارجع با مجنون
kalam
جامدة قد إية
قد شعبان
ولا قد كرش مين
فيهم
أبوشنب
ولو إنى معرفش اعوم
بس
ربنا يسهل
ونتعلق
ف قشاية
يا واد روح عند كل الناس وأعمل دعوه ليهم ييجي عندك المدونة بتاعتك وخلي كل الناس تقرا الكلام الحلو بتاعك متنكش نايم طول عمرك كده حاول
حاول
تصدق ينفع شعبان يبقى المستقبل
ويكون شعبان هو الحل
بلا وجع دماغ بلا وجع الحزب الوطني بلا مبارك بلا ابنه
بس خلاص
برضة
وبلا شعب ياشيخ
هى الشعوب عملتنلنا ايه
فيه غير شعبولا
إرسال تعليق