على بعد رصاصة

على بعد سجارة
وكباية شاي
فوق كرسى قديم
ومهكع
وف قهوة حقيرة ف حارة سد
فى شارع هزايمنا المفرود
......................
نايمة الأحلام
فوق ريش طواويس الليل
والليـــــــــــــــــــــــــل
نسناس
بردان متغطي
بضحك الناس
فى سيرك الوطن الهش
على بعد رصاصة
وسط حجارة
ورشة دم
فوق ارض بتعشق
طحن العضم
وتغني بحس غويط
آخر غنيوة
حزن
على بعد حروف
أنشف م الصخر
واقفة فلسطين
فاردة الدراعين
مصلوبة
ف جذع نخيل
عروبتنا
ويهوذا اللى بيجرى
ف دم العسكر
ندمان
عدمان تبرير
مركون جنب البدل
الكاكي
المكوية ف دواليب
الفرسان
( نشرت بجريدة القاهرة بتاريخ 2/ 5/ 2006)