الكلمة العريانة
بتطلع من بقي
وتدوس بالرجل الحفيانة
على راس الظلم
تسترنى
***
الناس فىبلادنا
الراقدة
فى الضلة البايتة
إل مغروزة جتتهم
فى الأرض الواعرة
الناس مساكين
وقلوبهم
دفيانة بحب النيل
ووعود العسكر
مغروزة جوة قلوبهم
سكاكين
***
الشاشة الألوان
بالعدل توزع أطباق الهم
وتنادي اتلموا
فالناس تتلم
وتحط ف جيب الواحد فيهم
أحلام خيبانة
حواديت مليانة خيانة
والشاشة بتبلعهم
وف آخر الليل
تطرشهم
هلافيت
****
البلد اللى بيكرهها النيل
البلد اللى ما بحبش غيرها
واقفة هناك عريانة
تستنى الواد يسترها بشاله
الواد ما يجيش
****
البنت البنوتة
اللى باشوفها تمللى ف عين الشمس
البنت اللى بتتزحلق
فوق صفحات
كراريسى
البنت الكلمة المكبوتة
اللى بتشرب من دمى
تلاقيها تمللى
بتكحت فى القلب الصخر
وتنبت جواه
حدوتة
هناك 4 تعليقات:
البلد اللى بيكرهها النيل
البلد اللى ما بحبش غيرها
واقفة هناك عريانة
تستنى الواد يسترها بشاله
الواد ما يجيش
بتفكرنى بالابنودى فى قصيده القدس
هيحررك ابنك اللى مانيش هوا
جميل يا ملك
مبروك النشر فى الدستور يا معلم
شكراً يا انتوك
ابوشنب
ولا اجمل منك
السهروردى
الله يبارك فيك يا عسل
إرسال تعليق