آخــر حـــدود النــــــــغم

مهداه إلى الشيخ إمام عيسى وإلى أحمد فؤاد نجم بتاع زمان
1
نغمة بداية
الشخبطة
فوق الورق
أفضل من الوجع
المحايد
2

الدخول جوة النغم

راقد ممدد
ع السكك
حاضن خشب عودك
لاضم غناوي
وحدتك
بخيط خفيف
مشدود
مابين سيخين
حديد
وتر رهيف
وهات يا عزف
ما كفاية نزف
يا ليل بيتسحب
فوق بلاط الروح
يا نيل جبان
واقف على حدود البلد

الإرتواء
مش غيتك
الوحل واصل م القدم
حتى الكتاف
وانت هنااااك
طعم البكا ال مش جبان
دايب فى وخز
دمعتك
يا أيها الفرس النبيل
اضرب حوافر غنوتك
وارمح
الأرض أقسى من دماغك
يا فتى
الأرض فخ
الأرض زايحة خطوتك
فافرد جناحينك
افرد على جبهتك
حزنك / مواويلك
وارمي على كتاف الفضا
همك
رشرش نغم سكتتك
فوق الوشوش المحبطين
شم ف غبار سكتك
شيله ف نخاشيشك
ابعت ضيا طلعتك
براك ورا شيشك
عايز الزمان يطمسك
محتاج لتهميشك
اوعى تجازف فى المحبة
يا فتى
آخر خطاوى رحلتك
قبر ف تراب الوطن

3

نغمة أخيرة

حطم جدار الخوف
واطلع جسد نخلتك
وسيب غناك
ينفلت
سيب الحبال
تنفتل
أصل الحبال مشنقة
مرجيحة للأبطال
ارمي الجسد
فى الفضا واوصل هناك
آخر حدود النغم
( نشرت فى جريدة أخبار الأدب يوم 16/ 11/2003)