الاثنين، أكتوبر 30، 2006

الأراجوز

أراجوز - من فيلم الأراجوز
للمبدع /سيد حجاب
أراجوز .. أراجوز .. إنما فنان
فنان .. أيوه .. إنما أراجوز
و يجوز يا زمان أنا كنت زمان
غاوي الأرجزة طياري .. يجوز
إنما لما الكيف بقى إدمان
باجي أبص لشيء واحد أرى .. جوز
أرى إيه؟ أرى إيه؟ أرى أرى أراجوز
***
فلسان .. كحيان .. أيوه أنا فلسان
إنما برضك .. راجل إنسان
بأضرب بالألف لسان و لسان
و باكلها بعرقي .. و مش إحسان
راجل و الرجولية لا عضلات
و لا ألابندة و سيما و حركات
الرجولية الحقيقية ثبات
قدام جبونية أي جبان
****
أراجوز أنا و أحمي أرى أرى إيه؟
أحمي قراريط الناس من مين؟
من الناس الأرى أرى إيه أرى إيه؟
من الناس القراميط الملاعين
ماهو أصل أنا مش من الأرى أرى إيه
مش من القراطيس
و لو الحال مال مقعدش أنا على
أرى إيه أرى إيه؟ .. قرافيصي و أطنش ع الأندال
لازم أشك الأندال مهموز
و أدوس ع اللي افترى و العنطوز
م أنا أرى إيه أرى إيه؟؟ أرى أرى أراجوز
****
أراجوز .. و شجيع .. و الدنيا ميدان
فارس .. حارس .. واقف ددبان
و إذا بان للشر نيبان و زبان
باحمي الغلبانة و الغلبان
و شجاعتي ماهياش في الطاخ طيخ
دي شجاعة تفكير و تماخيخ
الأرض أضربها تجيب بطيخ
بذكاوتي و أخللي الخلا بستان
****
أراجوز أنا .. و الدنيا أرى إيه؟
قرشانة و احنا شبر شبيط
ياما قرمتني و أرى أرى إيه؟
قرصتني ف لباليبي و أنا كبير
فسرحت أنفخ أرى إيه أرى إيه؟
أراغيلها و أغني يا ليلي يا عين
و أتمسخر على أرى إيه أرى إيه؟
أراذلها الفجرة الطماعين
و أضَّحَك كل صبي و عجوز
ع اللي بيتنطط فرقع لوز
مانا أرى أرى إيه؟ أرى أرى أراجوز
****
أراجوز .. و سايقها هبل في جنان
و أنا قلبي .. ملان جدعنة و حنان
و أبان ساهي سهتان سهيان
إنما عقلي للعدل .. ميزان
أنا فلتة .. إنما مش فلتان
و ساعات حرنان .. و ساعات زنَّان
يمكن علشان وحداني .. ما ليش أراجوزة تاخدني بالأحضان
****
أراجوز أنا .. و أقدر أرى أرى إيه؟
أراعيكي و أشيلك في عيوني
و إذا مرة زعلتي أرى أرى إيه؟
أراضيكي بعقلي .. و بجنوني
حُطِّي من السما على أرى أرى إيه؟
أراضيّه و اسلِّم لِك أمري
و كُلِي معايا في أرى إيه أرى إيه؟
قروانتي يا كروانة عمري
و بَدَل مانا كده ملوي الَبَزبوز
أصبح لك جوز معزوز محظوظ
إيه يا ترى إيه؟ أرى أرى أراجوز
أرى إيه؟ أرى إيه؟ أرى أرى أراجوز

هناك 17 تعليقًا:

كلبوزة لكن سمباتيك يقول...

ابو امل ازيك يا طيب عامل اية
اولا ماعاش اللي يطنشك بي انت عارف اخر رمضان و زحمته و العيد و لمته و السن و بلوته الواحد بينسى اسمه كل يوم و لازم حد يفكره
انا لا يمكن اطنش ابو الشعر و الزجل ابو امل
اسالتك علي العين و الراس بس استني يومين كده علي ما البوست الاخير يسمع مع الناس و ياخد سبوبته و يلم حق كومنتاته و بعدين انزل بالاستجواب و اهو بالمرة يكون في حبل عشيل فضي علشان انشر براحتي
اما بقي علي الاراجوز
فالقصيدة جميلة بس انا ارفض الفكرة
محبش اكون ارجوز
الجدعنة و الثقة لازم لهم وش حديد مش وش اراجوز
خالص تحياتي ليك يا غالي
و يعيد عليك الايام بخير و صحة و سعادة

سالفة قلب يقول...

ابصراحه كلامها واقعي جدا

والدنيا عامله زي السيرك


تحياتي

Unknown يقول...

كلبوزة
واحشانى قفشاتك
تقبل الله منا ومنك
عن القصيدة فهى للعزيز الغالى سيد حجاب
وهى تحفة فنية
وهى العيدية للأحباب



سالفة قلب
والمصيبة ان كلنا بنتفرج على كلنا
ومين اللى بيدفع لكلنا ثمن التذكرة يعنى
ما تعرفش

مـحـمـد مـفـيـد يقول...

الله عليك وعلي سيد حجاب

غير معرف يقول...

الله عليك بجد
ازيك عامل ايه؟؟
ياترى تقصد الأراجوز اللى احنا عارفينه
ولا حد تانى حوالينا او مننا بيلعب الدور دا؟

غير معرف يقول...

لو كنت أمير
من أمراء الحواديت
كنت ادى لكل فقير وفقيرة بيت
بيت بجنينة مليانة زهور
وبعشة مليانة كتاكيت
وأعلّق فوقه قمر بنور
ونجوم لولى... فتافيت فتافيت
لوكنت أمير
من أمراء الحواديت
كنت ادى لـ... وزرائى محاريت
علشان يشتغلوا بايديهم ويشوفوا ازاى
الأرض السمرا لما نحرتها كدة رايح جاى
بتطلع غلّة وبن وقطن وضل وشاى
وتطلع غاب نعمل منه الأرغول والناى
لو كنت أمير
من أمراء الحواديت
كنت أدّى لكل الأطفال الحلوين ألعاب
قطر بقضبان..فرشة ألوان.. مية أو زيت
وابنيلهم قصر على المالح من غير أبواب
قصر بقبة لولى وقبة مرجان
وأعلّق عالقبة أجراس
فضة ومرمر ودهب ونحاس
لكن قبل ده كلّه لو كنت أمير
من أمراء الحواديت
كنت ادّى لكل الناس
وردة وكتاب
وردة وكتاب
وكمان قبل ده كلّه
قبل ده كلّه
لو كنت أمير
من أمراء الحواديت
كنت أرفرف زى النسمة وادخل فى الحلق
وأقطّع نص السنة الخلق
نص اللى مابيقولش الحق
علشان يتعلمه
امتى يقولوا أيوة
وامتى لأ
ده لوكنت أمير
من أمراء الحواديت
مع تحياتى
سيد حجاب
email: hegabsayed@yahoo.co.uk

غير معرف يقول...

السلام عليكم ورحمة الله وبركاته :


إلي كل من يريد ان تعود للاسلام عزته
إلى كل من يريد الدعوة الى الله
الى كل مسلم يحمل هم أخيه المسلم
إلى كل قلب نابض بحب الله
إلى كل شاب او شابة ذاق ذرعا من المعاصي
إلى كل من حجبت المعاصي عن قلبه نور الايمان
الى كل متعطش للقاء الرحمان
الى كل رافض لما يبث فى الاعلام من إساءة للاسلام وتدمير للقيم والاخلاقيات
الى كل من يريد ان يتجرد من رداء الصمت
الى كل من يريد أن يكون الاعلام العربي هادف وبعيد عن التفاهة والسخف
إنظموا الى حملتنا التى تقول لا فى وجه كل من يحاول تظليل شبابنا
لنرفع أصواتنا و نقول نعم لإعلام هادف و لا لإعلام فاسد ...
نحتاج ان ننقذ شبابنا ونسائنا واطفالنا و امتنا جلها من سيوف الغرب التى تريد قطعنا و محو أثرنا تماما بشتى الطرق ...
هيا اخوتي و اخواتي نضع اليد فى اليد و نكون كالبنيان المرصوص نشد بعضنا البعض ونتعاون على البر و التقوى و ننهى عن الاثم و العدوان ومعصية الله ورسوله المصطفى ....

انها حملة ضد الاعلام المخل بالمبادئ والقيم الاسلامية ...

مدونة : اعلامنا ....سلاح دمار شامل
راسلونا على : i3lamouna@hotmail.com
مع تحيات المساهمون فى الحملة ..

بين الأمل و اليأس يقول...

انا بقه ليه نظره تانيه خالص للأرجوز انا بعتبره انسان شاف في دنيته كتير من الاحزان والالاموقرر انه يواجه الدنيا بنوع من الضحك والهزار وكل ده مجرد قناع خافي وراه جرح عميق شوه الصورة ودا انسان انا بعتبره اقوى انسان انه قدر يكمل وبعتبره اضعف انسان لانه يعتبر هارب من مواجهة الماضي وخايف لحسن يتعاد الشريط
لكن بجد الله عليك وكمل لان كل مابنقرأ الكلام اللي اتقال زمان ولو كان على لسانا محفور بنفكر في معناه من اول وجديد وبنعتبر منه في العقل غير لما يكون على اللسان
مغفهمتش حاجه لاكن مش مهم
ربنا يسترها

Unknown يقول...

محمد مفيد
بنا يخليك
متذوقاً للشعر
حياتى

Unknown يقول...

وينكى
والله ما نا يا حضرة الظابط
اللى قلت الكلام ده
د الأستاذ سيد حجاب
وانا عمرى ما شفته
بس بحبه قوى

مش انا والله
وينكى تحياتى

Unknown يقول...

انينوموس
كأننى بصدد غواية
ما هذا الأمر هل يمكن أن تكون سيد حجاب فعلاً أستاذى وحبيبى
يمكن ان تكون واحداً يعرف إميله ووقع باسمه
ع العموم شكرأ لك
على القصيدة التى تمنيت قرائتها من زمن وعقبال ما اتحصل على قصيدة كأس وحشيش
و....لاأتذكر عنوانها
كنت سمعتها على الجزيرة مباشر
وأيا كنت
فلك محبتى وتقديرى وإعزازى
فتحى حمدالله
أبوامل

Unknown يقول...

إعلام
شكراً لك ع الزيارة وخالص تقديرى على المهمة التى تقومون بها
على نبلها على قدر أهميتها وضرورة الإلتفاف حولها
تحياتى ولكم التوفيق

Unknown يقول...

بين اليأس والرجاء
الأراجوز نموذج إنسانى متفرد يمكن تحميله بمضامين بالغة الزخم وقد تناوله العديد من الشعراء أهمهم سيد حجاب وماجد يوسف ومستقبلا ً سأورد قصيدة لماجد يوسف وعلى هذا فالروعة فيما يقال من كلام ومضمون بغض النظر عن فنيات القصيدة المفروغ من روعتها فى الأصل
تحياتى

admelmasry يقول...

سيد حجاب شاعر جميل

غني عن اي كلام

وانت شاعر عبقري

يكفي انه من الصعيد واسمه ابو امل

Unknown يقول...

الحكواتى
أهلا بك
والشغل جاى
بس عاوزك تنتشر
والكل هيزورك انت قاص جيد
وتستاهل القراءة


آدم المصرى
دائماً
تمطرنى بذوقك واطرائك
تحياتى

كرانيش يقول...

معلش يا ابو امل دى من اقل ما كتب سيد حجاب له حجات فى منتهى الجمال يا راجل ملقتش غير دى؟؟؟

الاراجوز يقول...

الله عليك معلى عم سيد حجاب شاعر بهموم الناس وطبعا انا مبسوط جدا من هذه القصيده الرائعه جدا وكمان احب اقوللق ان هنا ديوان باسم الاراجوز للمبدع الكبير فؤاد حداد وقصيده اكتر من رائعه يحكى فيها الشاعر فؤاد حكايه ووصف للاراجوز ارجو ان تبحث عنها وتكتبها علشان الشباب يعرفوا قيمه هذه العروسه المصريه وايضا هناك مبدعين قدموا شخصيه الاراجوز ولعبوا بها لحث الناي وتعليمهم فى اعمال مسرحيه مثل الفنان انتصار عبد الفتاح والفنان بهائى المرغنى والفنان احمد حلاوه والفنا ناصر عبد التواب مع فرقه الاراجوز المصرى والعرائس اشكرك على هذا الجهد ووفقك الله لما فيه الخير الاراجوز