منين أجيب ناس / شعر: 05/07

اجمل 100 حاجة
فى واحد لسّه ما شفتهوش

الصلعة الخفيفة 1
اللى بتزحف على دماغه بغباء
وسنانه البيضا 32
اللى بتشهد بعلاقته الممتازة
بأفضل معجون اسنان
فى السوق
والغمازة اللى ف خده الشمال 1
وطريقة نطقه للحروف 28
حرف السين بالذات
وعنيه الضيقين 2
المليانين حدة وعدوان
مش مبررين
فى معظم الأحيان
والخمسة وتلاتين سنة 35
اللى فاتوا من عمره
من غير ما يشعر
بلحظة حب واحده
تخزى عين الشيطان
والبنت اللى بتطارده 1
ف خياله
وعمره ما شافها
بعنيه الضيقين
المليانين