على بعد رصاصة

على بعد سجارة
وكباية شاي
فوق كرسى قديم
ومهكع
وف قهوة حقيرة ف حارة سد
فى شارع هزايمنا المفرود
......................
نايمة الأحلام
فوق ريش طواويس الليل
والليـــــــــــــــــــــــــل
نسناس
بردان متغطي
بضحك الناس
فى سيرك الوطن الهش
على بعد رصاصة
وسط حجارة
ورشة دم
فوق ارض بتعشق
طحن العضم
وتغني بحس غويط
آخر غنيوة
حزن
على بعد حروف
أنشف م الصخر
واقفة فلسطين
فاردة الدراعين
مصلوبة
ف جذع نخيل
عروبتنا
ويهوذا اللى بيجرى
ف دم العسكر
ندمان
عدمان تبرير
مركون جنب البدل
الكاكي
المكوية ف دواليب
الفرسان
( نشرت بجريدة القاهرة بتاريخ 2/ 5/ 2006)

قلم نونو

قلم نونو
بيضحك
من ورا قلبه
مخبي دمعه
ف عيونو
قلم نونو وف قلبه الوسيع
شوية حبر
بيسيلوا منه
فوق فدان سطور

وف آخر المشوار يمل
بعد ما يكون زرع
فدادين كلام
قلم نونو
واقف على بداية
السطر البراح
وبسنه العنيد
بيبص ع المعنى
يجمعنا
نسقف له
ونهتف له
ونقف فى طابور الصبح
ونغنى فى حماسة وحب
.......................
تعيشى يا مصر

تعيشى يا مصر

ممكن

ممكن يتلم الشمل
ما بين الخبز الحاف
والجوع
أو تنقسم الضحكة
ما بين الناس
والورد
أو ترجع عصافير
الفجر
تغرد فوق الأغصان
ممكن ندخل جوة كتاب الحواديت
ونفتفت احداثها
فتافيت
فتافيت
ونعيد ترتيبهم من
تاني
ندى العاشق
سيف وحصان
علشان يخطف
قلب حبيبته
بنت السلطان
أبو قصر كبير
ممكن
ممكن
على سطح الممكن
فى الدور الأخراني
لخيالنا المبدع
نحبي بشويش
بشويش
واحنا بنبص لفوق
ع القمرة
وف لحظة ما نبص لتحت
نقع فجأة
على
أرض الواقع



أبو أمل

كلام متخبي ف عيون البنت

الكلمة العريانة
بتطلع من بقي
وتدوس بالرجل الحفيانة
على راس الظلم
تسترنى
***
الناس فىبلادنا
الراقدة
فى الضلة البايتة
إل مغروزة جتتهم
فى الأرض الواعرة
الناس مساكين
وقلوبهم
دفيانة بحب النيل
ووعود العسكر
مغروزة جوة قلوبهم
سكاكين
***
الشاشة الألوان
بالعدل توزع أطباق الهم
وتنادي اتلموا
فالناس تتلم
وتحط ف جيب الواحد فيهم
أحلام خيبانة
حواديت مليانة خيانة
والشاشة بتبلعهم
وف آخر الليل
تطرشهم
هلافيت
****
البلد اللى بيكرهها النيل
البلد اللى ما بحبش غيرها
واقفة هناك عريانة
تستنى الواد يسترها بشاله
الواد ما يجيش
****
البنت البنوتة
اللى باشوفها تمللى ف عين الشمس
البنت اللى بتتزحلق
فوق صفحات
كراريسى
البنت الكلمة المكبوتة
اللى بتشرب من دمى
تلاقيها تمللى
بتكحت فى القلب الصخر
وتنبت جواه
حدوتة

واو

الدنيا مرة كالسم هم وضيق ف المعايش
شارب يوماتي كاس سم عايش حياتى وما عايش

نزيف السكات

نزيف السكات


الفقر كتكوت
بينقر ف العيون
نبوت بيرزع

ع البيبان القفولين
وايدين عفية بتتسند
فوق الكتاف الشقيانين
وكفوف بتلطم ع الوشوش
وكلام معشش فى النافوخ ما احناش فاشوش
ليكم عروش لينا البروش
جوة الحيطان
القسيانين
والليل حزين
والعز نجمة هناااك
بعيييد

والفقر أنشودة الغلابة
المطحونين
المعبوطين
بسياط غناوي فرحانين
المدهونين بالحبر لسود للعناوين الكبيرة
يا جماهيرى الغفيرة
بكرة أحلى من النهارده
بكرة ياجيلنا الجديد
سقفة يا جيلنا الجديد
افرحوا يا أهل البلاد
فليعيش السندباد
فليعيش السندباد


الفقر لازق ف الفقير
والعز لايق ع الأمير
واللقمة فى بق الحمير
مغموسة جمر
والكلمة من حلق السكات
تطرح آهات
والليل نايات
عمالة تنزف
حزننا

آخر عروسة نيل

آخر عروسة نيل
مهداة إلى نهي الزينى وإلى كل قضاة مصر الشرفاء
مفتتح :
إن كنت يانيل بتجري فهلوة
فاحبس ميتك
وإن كنت يا نيل
بتتغابى على الناس
اللي فى عروقها دماهم/ ميتك
فبلاش تضخ
في عروق الوطن
خليك فطن
سيّل على شطوطك عطن
مرجح على خدك
دموع الصبايا الأغبيا
وافتح دراعينك / دلتاك
لفرسان المحن
حضنك وسيع
ولا ما عادش يساع
عروسة نيل
ياااااااااااا
نيييييييييييل
مــــــــتــــن
يا ام الضفاير سود
ليل طويل حالك
ابكى على حالي
فى الهوى
ولا ابكى على حالك
ولا أندهك غنيوة حزنانة
ولا اشربك
يا قلة عطشانة
أو فاشربينى مية
ف كفوفك
سيبينى ابدد ضلمتك
خوفك
خلينى اشب بأقدامى النحاف
واوصل طراطيفك
يا أم الضفاير سودة
كما قلب البلاد الهلس
متقسمة النسمة
ما بين الشط والمية
متقسمة الكلمة
ما بين ضهر متعري
وكرباجك
ما بين ريشة بتنقر
على وتر بيحس
وبين حدوتة مبحوحة
ما بين صرخة مكتومة
وبين شومة
بتنزل على راس الوطن
في الزحام
يا أم الضفاير أسود من الضلمة
والقلب أدفا من الضمة
يا أم الجبين شامخ
كما القمرة
فى ليلة بدر
يا أم الغيطان حواديت
صوت السواقي نغم
ولا كلام مواويل
ولا دموع بتسح
تنعي ولاد غاليين
ماله الربيع حزنان
مكسوف لا يلبس جلابية ألوان
ولا يا ترى ندمان
لما العيون
ما عادتش تحلم بلأمل
هامـــش
ناعم يا صوت الناي
خجلان يا قلب الكمان
متوردة يا خدود بهية
من جوة روح نجيب سرور
مستسلمة ونايمة ف أمان
يا مصر وانت بتحلمى

القلم فارس

القلم فارس
ركب القلم
ضهر الورق
نغز بسنه المفتري
بياض سطوره
وانطلق
******
ضى القمر هو اللى متخبي
ورا فروع
الشجر
واللا العيون
ماعادتش
تحلم
بالضيا
*****
قضبان حديد
مغروزة
فى نص المسافة
بين عنيك
ووحدتي
واحنا وراها
أو أمامها
مسجونين
أبو أمل