مشاهد باهتة للموت

الحزن ساكن في القلوب
والناس يا دوب
طايلين يموتوا في النهار
والليل تملى في انتظار
ألفين خيار
يا تموت وليد
يا تموت شهيد
يا تعيش 00000
واقف على بداية طريق
ما بينتهيش
والأرض من تحت الحوافر
ترفضك
تفضل تبعتر خطو تينك
في الفضا
الخطوتين من عجزهم
ما بيوصلوش
تقف وتبدر خطوتينك من جديد
جوه التراب اللى اشتهاك
اللى انتظر لحظة شروق
لحظة ما ينزف بوز قلم
مشبوك فى جيب الجلابية اللى اتحشت
حبة ملامح باهتة
لحظة سقوط الضى فوق
وش الشتا
لحظة ما تعزف كف بكرة الباردة
حفنة اشعة دفيانين
وترشهم فوق الشجر
فوق البيوت
والشمس شقت توب نهارها حتتين
حتة دابت من خطايا المذنبين
وحتة شالتها كفن
وطلعت على سن الجبل
ماتت من التعب
والعنكبوت اللى اسمه ليل
غازل على حد السما
خيطان ضلام
وبحبه موت
العنكبوت
الليل عشان بيودنى
محتاج له موت العنكبوت
الليل عشان بيلمنا
ف حضنه الوسيع
العنكبوت غازل على وشوش البشر
خيطان وهن
العنكبوت 00000
اللى اسمه0000موت 0000

بور تريه

بور تريه

اناوانت اتنين
شايلين أحلام
وكلام مرشوش
بحلاوة بكره الجاية قوام

أنا وانت اتنين

ما انتاش إبليس
ولا حتى ملاك
الحب ماليك
والخير جواك
عصافير بتطير للخير ساكناك

أنا وانت اتنين

قابضين على الجمر
وجوة قلوبنا بينبت زهر
ونشرب مر
ونلحس كف الصبر
ونيجى في آخر الليل
نتوضى ونرضى بحبة تمر

أنا وانت اتنين

واخدانا السما
جواها نجوم
بأكمل فيك أنغام مزازيك
وتكمل فيا حروف ما تشوف
غير فجر وليد
وف زحمة ليل العوزة ألقاك
تديني النص الناقص منى
أديك القلب اللي ساكنى
تتربع فيه0000
تسكني

بالخط الكوفي

بالخط الكوفي
وبلمسة من فرشة قلبك
فوق جلدة كراسة فلبى
اكتبني
من غير ألقاب
من غير مفاتيح
ولا حتى أبواب
ادخلنى
ملس على شعر حبيبتي المبلول
واقرا لها الفاتحة
حبل غسيلها ناشف من ست سنيين
لمه وبعترنى
واغمس فرشاتك ف دموعي
واعشقـني في كل حروفي
وبلون خدين حسنائك
اكتب فائي
اكدب لو قلت وفائي
لأول بنت ف عمري
زى وفائي لعيون حسناء
بالخط الكوفي
اكتب تانى حروفي
اكتب تائي
جمع تواريخي
لم الخوف اللي ساكنى ف نقطة
ولم العجز السوس الناخر في العضم ف نقطة
ولم علاقة الخير بالشر في غنوة
واحد فها في عين الشمس
واستني الغد يطق عليك من فوق
لحظة ما الشمس تخر شروق
بالخط ا لكوفى

اكتب حائي
لغمط ألوانك وانترهم حوالين الحرف
اسحب م الحاء الباء
المغروزة في لحم القلب
وبطرف الاستيكة امسح
كل الباءات المكتوبة في معجم الفاظى
وبسن الأزميل
فوق جدران القلب الصلب
انحت صورة جميلة لوش آمال
بالخط الكوفي
لولب على قد ما تقدر يائي
لفلف حوالين الحرف حبال
وانده على كل بنات الحور
ف خيالك
خيرهم ما بين الموت
وما بيني
واشنقهم
واقلب جلدة كراسة قلبي
وبالخط الكوفي
وفى نص السطر اكتب
فتحي